Есте сақтаудың тиімді жолдары 

Күнделікті айланамыздағы зулап өтіп жатқан ақпараттардың бәрін есте сақтау мүмкін емес,бірі болмаса бірін ұмытып қала бересің,айталық: қажетті телефон нөмірі, емтихан не реферет тапсыру уақыты, автокөлік нөмірі,туған күндер…т.б. ТОҚТА! Өз атымызды ұмытып қалатын жағдайға жетпей тұрғанда ШАРА қолдану қажет!

Ендеше,есте сақтау қабілетін жақсарту әдістеріне СІЗ де көз жүгіртіңіз:

1.  Ешқашан жалқаулыққа салынба. Өйткені, жалқау адамның ойлары әлсіз келеді де, есте сақтау қабілетін төмендетеді.
2. Егер бір нәрсені ұмытып қалсаң,айталық: есеп-қисап цифрлері, бір сөздің мағынасы, әншінің есімі т.б. бірден сөздік,кітапша, интернет көмегіне жүгінбей, бірнеше минуттың ішінде еске түсіруге тырыс.
3. Қызықты кітаптарды оқығаннан кейін қысқаша сюжетін, басты кейіпкерлердің аттарын қойын кітапшаға жазып қой. Уақыт өте әлгі жазбаны көзіңмен бір шолып, оқыған дүниеңді еске түсіріп отыр. Бұл еске түсіру қабілетін жақсарту жаттығуы болып табылады,оның үстіне достарыңның ортасындағы отырыстарда *жұлдыз* болуыңа ықпалы зор. Әйтпесе,әңгіме-дүкен барысында оқыған кітаптардағы оқиға желісі, кейіпкерлердің есімі кімнің есінде тұрады дейсің…ал сен оп-оңай зуылдатып бересің.
4. Спортпен шұғылдан,көп қимылда,үнемі қозғалыста бол. Белсенділік адамның миындағы қан айналымды жақсартады, хабарламаларды қабылдау барысын реттейді.
5. Есіңде болсын, көз алдыңда тұрған мәтінді мағынасын жете түсінбей жаттап алу кері әсерін тигізеді,неғұрлым өз сөзіңмен айтып жеткізсең, есте сақтау қабілетің жоғарылай түсері хақ.
6. Қайталау- есте сақтаудың қайнар көзі болып табылады. Бірақ, мәтінді бір дегенде бес мәрте емес,бес күннің ішінде бір реттен /түнге қарай болса тіпті жақсы/ қайталап оқып отырсаң, әлдеқайда есте қалады.
7. Қолөнер бұйымдарын тоқумен айналысуды үлкен апаларымыздың не үйде отырған әйелдердің ғана ісі деп танысаң-қателесесің. Тоқыма,шілтер тоқу, моншақ тізу,киім тігу істерінің бәрі- мидың есте сақтау қабілетін бекіте түседі.
8. Балық, мұхит тағамдары, сұйық май,көкөністердің тигізер пайдасы зор. Кейде шоколод жесе де болады.
9. Ал психологтарымыз шет тілдерін үйрену қартаюдың жолын қысқартады деп дәлелдеген көрінеді,яғни ол да есте сақтау қабілетін арттыруға ықпал етері сөзсіз.

10.  Ал кей адамдар сандарды әр түрлі әдістер арқылы есте сақтайтын   көрінеді: 2218 санын жаттау үшін: 2 саны–аққуға, 1 саны–бағанаға, 8 саны- матрешкаға /қуыршақ/ ұқсайды, осыдан «жаттығу» құралады… «екі аққу ұшып келіп,бағанаға қонғанда, алыстан матрешканы көреді…» (күлкіңіз келіп кетті ме…сабыр сақтаңыз…бұл небәрі жаттығу түрі ғой…)